Storm ná die stilte ...

Ons nessie in Pretoria - klein maar perfek, vir eers.

Die afgelope maande het ek hier geswyg. Nie omdat ek wou nie, maar omdat ek bloot nie die tyd of krag kon vind nie. 

Ons lewe het drasties verander: Ons het in Februarie ons tuiste in Sabie verlaat vir die groot stad. Ons was ongelooflik geseënd om ons plekkie daar, mét gastekamers en al, in die dierbare hande van twee oulike familielede te laat.

Ons kon met vrede weggaan.

Die redes waarom ons ons welige, pragtige wêreld verruil het vir Pretoria, is veelvoudig. Vir ons besigheid, Rappard Reise, was dit net die beste keuse. O R Tambo is nader! Ook het ons boekbekendstellings en ander sosiale geleenthede ons sakke seergemaak van daar af.

Persoonlike redes het ingesluit, verlange na kinders en kleinkinders, 'n gevoel van isolasie doer in die berge waar meeste van ons vriende en ons familie al weggetrek het, en die gebrek aan broodnodige fasiliteite vir ons as senior mense.

So het ons die afgelope maande ons voete hier in die stad gevind. Baie van ons besittings bly vir eers nog in bokse want ons woon tans in 'n piepklein flatjie waar ons net die nodigste in kan huisves. 

Maar, ons is sielsgelukkig. Ons het van die begin af ná ons herontmoeting al besef dat ons baie nou kan saamleef. Ons hou daarvan om close te wees!

Ons werk ook baie hard aan ons reisbesigheid - ek wil amper sê dag en nag, want soms beantwoord ons tot laataand toe nog navrae en stuur inligting. Ons is opgewonde. Ons voel ons gee mense die geleentheid om ook te leer reis sonder om die bank te breek - soos ons self geleer doen het.

So ja, liewe leser, ons leef nog, dit gaan goed en ons is omsingel deur nuwighede en uitdagings!
​
Tot straks!
​Stephanie

---