Kaggelstories

Man, maar mens kan nie glo hoe een eenvoudige dingetjie mens soms net so verskriklik gelukkig kan maak nie! Dié keer is dit ons nuwe kaggel - het dit op OLX gesien, in die donker gaan haal (dankie tog vir GPS) en in die sitkamer staan kom maak. Die huisieoppikoppie se sitkamer was altyd so sonder 'n fokuspunt en reg vierkantig soos tipies 40's boustyle soms was. Ook het ons huisie betonplafonne, wat dit redelik moelik sou maak om 'n skoorsteen in te bou. Die nuwe kopie is eintlik net 'n 'vals', elektriese kaggel, maar hemel, kan dit darem bydra tot 'n fantastiese atmosfeer! Die kooltjies lyk soos regte kole en daar is selfs vlammetjies en klank (of is dit pure verbeelding?). Nee dit was nou wraggies 'n absolute 'bargain' teen R1250!  En nou is dit ons grootste lekkerte om saans met 'n musiekie en kerse te sit en gesels tot laataand toe.

Klein dingetjies ...

Ook is ons gastekamertjie te pragtig oorgedoen - wat 'n laag verf en klein veranderings darem nie kan beteken vir 'n ou afgeleefde kamer nie. Henk werk hard, die arme man, maar vanoggend kom my verwer van ouds hier aan en kwoteer ons 'n wonderlike prys om aan te gaan met die ander verfwerk -  en ons sugggg 'n sug van pure verligting. Nou kan ons aandag aan ander dinge begin gee.

Die beste nuus wat ons dié week kon ontvang, is dat een van die seuns uit Holland, en sy verloofde, in Januarie vir ons kom kuier - vliegkaartjies is sommer klaar aangeskaf en hulle is vreeslik opgewonde om 'Zuid-Afrika' te kom ontdek. Ook kom ons Hollandse vriende binne twee weke hiernatoe, en daarna sien ons ook baie uit (daarom ook dat ons so hard werk om alles darem leefbaar te kry voor hulle arriveer).

Aan die frustrasiekant het ons nog ons dorings in die vlees. Steeds is die container nog nie hier nie, en die antwoord op Henk se visumaansoek is nog nie terug nie.

Maar die weegskaal bly-bly swaarder weeg aan die positiewe kant - en ons geniet alles net en probeer nie te veel tob oor slegte moontlikhede (visum) nie - alles sal regkom. Of soos Henk gereeld vir my sê: "Alles komt goed, Liefie".

En ek weet hy is reg.

---