Gestrand in Fiumicino

Reisbrokkies 1: Persoonlike ervarings, lag en traan

Sonsondergang oor die Medittereense See - hoe mooi is dit nie?

Jippie! Het ons gedink toe ons in Mei dié jaar in Rome land. Ons het maande voor die tyd al alles in detail beplan. Alles was in plek. ʼn Hele maand van avonture het voorgelê. Ons eerste oornag was in Gaeta, suid van Rome, bespreek. Die tweede nag in Napels en die derde in Herculaneum. Wel, so mis ons toe al drie! Sonder om te veel in te gaan oor die redes dat ons vir drie volle dae sonder ʼn huurkar gestrand was, het ons uitgelewer en sonder verblyf in die effens verwaarloosde kusvoorstad van Rome, Fiumicino, beland.

ʼn Duur taxi het ons gaan afgooi en ons stap toe windverwaaid en desperaat by die eerste hotelletjie in Via del Faro 148, Fiumicino, in. Wel, al wat ek daarvan kan sê is: Wat ʼn gelukskoot! Die oulike eienares, Alessandra, van die Rome Airport Inn sien toe seker dadelik ons nood raak en bied vir ons ʼn kamer teen afslag aan. Daar geniet ons die volgende oggend dié beste ontbyt van ons hele reis, deur haar gawe man, Marco, wat alles self voorberei en met swier net bly aandra: Eiers met olyfolie en kruie, vars aarbeie in ʼn sousie, joghurt, muesli, koue vleis, kaas, croissant, vrugte- én tamatiesap, cappuccino, ens, ens, ens. Volgens ons was die ontbyt maklik die helfte van die tarief werd!

Aangesien hulle toe volbespreek was die aand daarna, het die dierbare mense vir ons ander plek bespreek en met hulle ook ʼn laer prys onderhandel. Vriendelike Marco het ons gratis met die shuttle weggebring.
http://www.romeairportinn.com/

In dié dorp het ons kilometers te voet afgelê. Ons het winkels ontdek en eetgoed aangeskaf, ʼn glas wyn saam met die locals by die eenvoudige plekkie op die hoek gaan sit en drink, baie seekos geëet en ons saans verkneukel in die Italiaanse manier van parkeer daar van ons balkon oorkant die Mediterreense See af. Ook het ons besef dat 'n bidet ná ʼn goeie skrop, ideaal kan wees om wasgoed in te was!

Die middag toe ons met ons karretjie, Blackie - 'n Renault Twingo - by Golden Cars uitry, het ons vakansie nie regtig eers begin nie. Fiumicino is ontdek, Ostia se ruïnes en kasteel met verwondering ervaar en bo allles, ons het hartsmense ontmoet en sielskos geproe.

Die volgende oggend het ons in die pad geval en Fiumicino tot siens gewuif. Ons sou tog by Gaeta verbyry, by Napels aandoen en elke oomblik verder geniet.

---

Klik onder op galery om onderskrifte te sien.