Dankbaarheid

Ridderzaal

Mens kan nie anders as om net dankbaar te voel nie. Die laaste week of twee het ons sulke goeie weer hier gehad, soms bietjie koeler as ander, maar dan verras die son mens soms desnieteenstaande die weervoorspelling van die dag. Dit bly dan 'n bonus. Saterdag byvoorbeeld het ons nie veel verwag nie, en tog, daar in die besige middestad, reg oorkant die Hofvijver, drink ons koffie op 'n terrassie, en die son skyn te heerlik op die sonuitgehongerde massas - weer eens, gesigte na die son gedraai asof hulle die son behoorlik innooi in hulle lywe in!

Dan is ek ook innig dankbaar dat my skrywery weer spoed kan optel. Ek was vir maande ongefokus, en skielik het die kreatiewe juices my weer gepak en kan ek weer artikels skryf, én kry van hulle verkoop ook. Wat kan 'n vryskutter soos ek nou meer vra?

En die dankbaarheid strek verder ook, of is dit nader? Die liefde van ons albei se kinders en gesinne dra ons deur moeilike tye; my ma se enkel is amper gesond; dit gaan wonderlik met al die kleinkinders, en ons familielede en vriende oral staan ons by met raad, daad en good vibes! Dankie vir almal, ek hoop ons kan eendag dieselfde vir julle beteken!

Dan laastens, dié week kom baie dinge eindelik tot 'n punt - dit is die einde van slegte tye en die begin van net nog meer goeies vir ons!

So, wie kan my kwalik neem dat ek net gevul is met 'n diepe dankbaarheid?

---